Заедничката песна на Елена Ристеска и Панчо од ДНК, насловена „Како да се радувам“ доби и спот кој денеска беше објавен. Станува збор за нумера која е дел од новиот албум на Ристеска, насловен „Без шминка“.
На спотот се работеше неколку дена, а се снимаше во познатото казино „Фламинго“ во Гевгелија.
Режијата е на Бане Поповиќ и „Томато продукција“, а во него покрај Панчо и Елена се појавуваат и нашата преубава манекенка Симона Станковска, манекенката од Србија, Марија Марковиќ, а улога има и Зоки - Свила.
„Песната „Како да се радувам“ е една од новите песни која се наоѓа на мојот последен албум и по неговата промоција веќе ми беше јасно дека мора да се снимиме спот за неа. Се надевам дека публиката ќе ужива, а впрочем ова е и мој подарок по повод денот на жената 8 Март“, изјави Елена.
И познатиот аренби артист и диџеј не го криеше задоволството од соработката со Елена.
„Со Елена многупати сме разговарале за соработка и конечно се случи. Јас уживав во снимањето на песната, а исто така и додека го снимавме спотот. Нека биде исто така оваа песна и спот подарок од мене за сите припаднички на понежниот пол“, изјави Панчо.
За спотот да изгледа така како што изгледа заслужни се и Даниел Николовски, Мила Кадриу и „Фешн Груп“.
