Скопје, 27 февруари 2020 (МИА) – Покрај пациентката кај која вчера беше потврден корона вирус Covid-19, на Инфективната клиника во меѓувреме се тестирани уште две лица, кај едното е негативен резултатот, а кај второто парцијално позитивен и се прават дополнителни тестирања, информира денеска министерот за здравство Венко Филипче.
– Едниот е возач на камион кој патувал преку северна Италија со симптоми на грип и неговиот тест е негативен, а вториот случај е жена која со сопругоит била на патување во Рим. Нејзиниот тест е само парцијално позитивен што може да биде вкрстена реакција од други вируси. Затоа се прави дополнително тестирање за да се отстранат сомнежите. Резултататите ќе бидат готови за два часа, истакна Филипче, во изјава за мадиумите на Вториот Форум за национално здравје.
Тој посочи дека пациентката со потврден коронацвирус е во добра состојба и оти во меѓувреме се исконтактирани и ставени во домашна изолација и лицата кои биле во контакт со неа и со другите патници во комбето со кое се превезувале. Сѐ досега укажува дека лицата не биле во контакт со голема маса луѓе.
Како што најави Филипче, денеска во 13 часот ќе има состанок комитетот за координација на активностите заедно со припадници на МВР на кој ќе биде утврдено дали ќе продолжи домашната изолација за лицата или тие ќе бидат преместени во центрите за изолација на инфективните одделенија.
