Вашингтон, 14 мај 2019 (МИА) – Американската филмска компанија Walt Disney презема контрола над видео стриминг сервисот Hulu, кој е главен конкурент на Netflix и Amazon Prime.
Според договорот за купопродажба што беше објавен денеска, 33 отсто од акциите на сервисот остануваат во сопственост на телекомуникациската компанија Comcast, додека контролниот пакет на акции ќе го преземе Disney.
Согласно договорот, постои опција Disney да може да го откупи и преостанатиот удел од 33 отсто, ако една од компаниите изрази подготвеност за тоа по јануари 2024 година.
Сегашната вредност на Hulu е 27,5 милијарди долари, но ако дотогаш таа порасне, тогаш Disney ќе плати повисока цена за уделот на Comcast.
Видео стриминг сервисот започна со работа во 2010 година и беше дел од телевизиите NBC и Fox. Дизни очекува бројот на претплатници на сервисот до 2024 година да порасне од сегашните 27 милиони до 60 милиони корисници.
Според некои анкети, во САД се повеќе се намалува бројот на гледачите на класична кабелска телевизија, додека расте бројот на корисниците на видео стриминг. Лидер во оваа област е Netflix, сервис кој има речиси 150 милиони корисници, а неговата пазарна вредност е 152 милијарди долари.
Филмската компанија Disney се стреми да навлезе на овој пазар и да стане сериозен конкурент со својата разновидна филмска содржина. Компанијата неодамна најави создавање свој стриминг сервис Disney.
