Шестгодишно дете од кинеската провинција Хубеј видело како дедо му умира, а потоа со денови останало само дома со неговиот труп поради забраната за движење воведена со карантинот за корона вирусот.
Веста за премрежјето на детето го обиколи светот и предизвика гнев и разочараност кај јавноста.
Во областа Џангван во градот Шијан, каде беше воведена „контрола како во време на војна“ за да се спречи ширењето на вирусот Covid-19, локални комунални работници во понеделникот попладнето откриле дека дедото Тан починал во неговиот дом.
Неговиот внук Гуо Руибинг, за кој се претпоставува дека има шест години, бил со него во куќата, објавија локални медиуми. Детето со денови било само во куќата и преживеало јадејќи бисквити.
Кога го прашале зошто не излегол да побара помош, Гуо рекол: „Дедо ми рече да не излегувам. Надвор има вирус.“
Во тек е истрага да се утврди причината за смртта на дедото и колку денови детето било само дома. Исто така се истражува зошто никој со денови не поминал во куќата, со оглед на тоа дека согласно мерките за карантин, дежурните служби требало да поминуваат еднаш дневно за да ги проверуваат локалните жители дали им требаат залихи и дали имаат температура.
Областа Џангван беше првата во која во почетокот на месецов беа имплементирани вонредните мерки за карантин како реакција на заразата со корона вирусот.