Денеска во Приштина Косово и Израел го играат натпреварот од осмото коло од квалификациите за Европското првенство.
Косовскиот напаѓач Ведат Муриќи го осуди однесувањето на израелската полиција: „Израелската полиција нè проверува на аеродромот во Приштина. Ова е многу чудно, вакви работи никогаш не се случиле. Ништо вакво немаше кога доаѓаа Романија и Црна Гора“.
„Ова не е војна, ова е фудбал. Искрено, ова е скандал. Прво, што прават во нашата татковина?“, се запраша напаѓачот на Мајорка и додаде: „Не разбирам зошто Израелците се толку загрижени, дојдовме овде да играме фудбал. Не ми е гајле дали се под притисок, неверојатно е што израелската полиција дојде овде да провери нас, особено на аеродромот во Приштина. Овде сме поради спорт, а не поради војна или политика. Јас сум против политиката во спортот, но за жал се случуваат вакви работи“.
Овој натпревар требаше да се одигра на 12 октомври, но УЕФА го одложи. Израелските власти не ѝ дозволија на репрезентацијата да патува во странство поради конфликтот со Хамас.
