Кошаркарите на Работнички со убедлив пораз стартуваа на квалификацискиот турнир за ФИБА Еврокупот. Работнички синоќа загуби од романскиот Рапид со 57:87 (20:21, 21:24, 14:21, 2:21).
Работнички против гостите од Романија имаше сили само за едно полувреме. Тој период заврши со 4 поени предност за Рапид.
Целосен распад на системот следуваше во второто полувреме. Некаде во вториот дел од третата четвртна Рапид со серија 2:10 прв пат стекна двоцифрена предност и тука приказната заврши.
Последната четвртина ќе влезе во аналите на кошарката бидејќи кошаркарите на Работнички постигнаа само 2 поена.
Трајс и Џелетовиќ со по 15 поени беа најефикасни кај Работнички. Приџет го предводеше Рапид со 23 поени, 7 скока, 5 асистенции и 4 украдени топки.
Денеска од 20:30 часот во СРЦ „Кале“ Работнички ќе игра против Сабах од Баку, на чија клупа седи Боби Митев. Азербејџанскиот тим во првото коло го победи Гронинген со 75:72.
