Графит најден на железничка станица во Токио, Јапонија можеби е дело на мистериозниот британски уметник Бенкси, објавија локалните медиуми.
Графитот наликува на славната слика на Бенкси „Стаорец со чадор“ на која стаорец се спушта во лет со чадор во рака.
Не е познато кога точно бил нацртан графитот, но службите велат дека знаат за неговото постоење „веќе некое време“.
Сомнежот дека можеби се работи за дело на Бенкси се јавил откако графитот го пријавиле локалните жители.
Графитот е направен со боја во спреј на врата во близина на железничката станица Хиноде во централно Токио.
Гувернерката на Токио Јурико Коике на Twitter напиша дека графитот можеби е „подарок за Токио“.
Вратата е извадена и ставена во магацин за да се спречи оштетување на графитот, соопштија владини служби.
Уште се работи на утврдување на потеклото на графитот, но не се знае дали има експерт во Јапонија кој би потврдил дека се работи за дело на Бенкси.
Анонимниот британски уличен уметник Бенкси е познат по тоа што црта уметнички дела на јавен простор што потоа најчесто се продаваат за огромни суми пари.