Новата ТВ-серија „Chernobyl“ стана најгледаната содржина со највисок рејтинг набрзо откако почна да се прикажува, а податоците на IMDb покажуваат дека ги надмина и мегапопуларните „Game of Thrones“, „Breaking Bad“ и „The Wire“.
Серијата во пет дела на продуцентската куќа Sky Original претставува драматизација на нуклеарната катастрофа од 1986 година во Украина и нејзините последици, како и приказните на луѓето погодени од експлозијата и на оние кои биле задолжени за операцијата.
Серијата во која главните улоги ги играат Џеред Харис, Стелан Скарсгард, Емили Вотсон и Џеси Бакли доби пет ѕвездички уште откако дебитираше на Sky Atlantic и на NOW TV на 7 мај.
Првата епизода ја гледале речиси 2 милиони луѓе.
За помалку од три недели „Chernobyl“ скокна на врвот на листата во секцијата филм и ТВ на IMDb.
„Овој неверојатен проект на Sky Original привлекува широка публика и со право – сценариото и продукцијата се без маана, приказната е фасцинантна и крајно трагична“, вели програмскиот директор на Sky Original, Заи Бенет.
Серијата има највисок рејтинг за ТВ-серија на IMDb од 9,5, а на Rotten Tomatoes има позитивен рејтинг од од 96%.