Ракометниот клуб Еурофарм Пелистер активно се вклучи во кампањата на РСБСП за подигање на свеста за поголема употреба на сигурносниот појас од страна на возачите и патниците.
Ракометната еуфорија која деновиве ја зафати Битола во очекување на натпреварот Еурофарм Пелистер и Нексе од Нашице имаше своја „епизода“ и на битолските улици. На општо изненадување на битолчани, вчера во Битола од страна на РСБСП, МВР и Црвениот крст-Битола, а со поддршка на РК Еурофарм Пелистер, беше организирана превентивно едукативна акција во рамките на кампањата „Стави појас“.
Спортскиот директор на РК Еурофарм Пелистер, Димитар Митревски и македонските репрезентативци Никола Митревски и Гоце Ојлески, претседателот на РСБСП Гордана Кожуваровска, Саше Гилевски-началник на сектор за превенција на СВР Битола и претставници на општинската организација на Црвениот Крст од Битола, вчера на улиците во Битола делеа освежувачи за автомобили и друг едукативен материјал со совети и пораки за тој кој, кога и зошто треба да користи сигурносен појас во возилото.
Возачите и патниците кои ги почитуваа прописите и правилата во сообраќајот и кои веќе го имаа ставено појасот беа изненадени и станаа добитници на билети за натпреварот Еурофарм Пелистер и Нексе, а некои од посреќните добија и по некој дрес или маица од македонските репрезентативци и од претставниците на клубот.
Акцијата „Стави појас“ продолжува и вечерва, за време на натпреварот. Сите посетители на денешниот натпревар помеѓу Еурофарм Пелистер и Нексе ќе добијат едукативен материјал и освежувач за автомобил брендиран со боите на клубот и сигурносен појас.
„Стави појас“ - за твоја безбедност! - е пораката која вчера беше испратена до возачите и патниците во Битола.
