Американската академија за филмски уметности и науки донесе одлука да ги исклучи комичарот Бил Козби и режисерот Роман Полански од своето членство.
Козби и Полански, на тој начин, станаа првите членови кои се исфрлени од споменатата академија поради кршење на најновиот кодекс на однесување, кој академијата за филмски уметности и науки го усвои во декември минатата година, откако во јавноста се појавија низа на обвиненија во врска со сексуално вознемирување и злоставување во филмската индустрија.
Козби минатата седмица беше прогласен за виновен по три точки од тужбата за сексуално злоставување.
Роман Полански, од друга страна, кој во 2003 година беше награден со Оскар, призна дека во 1977 година имал незаконски сексуален однос со 13-годишно девојче во Лос Анџелес.
Од страв дека ќе добие голема затворска казна тој побегна во Франција, а неговиот случај се уште трае.
Претставниците на Бил Козби и Роман Полански се уште не ја коментираа оваа одлука на академијата за филмски уметности и науки.
Академијата, пред да го донесе новиот кодекс, во октомври минатата година беше принудена да го исфрли филмскиот продуцент Харви Вајнстин, откако многу жени го обвинија за сексуално злоставување.