Од изборниот штаб на Берни Сандерс денеска соопштија дека сенаторот од Вермонт ја заврши кампањата за претседателска номинација од Демократската партија на изборите годинава во ноември.
Како што укажаа од штабот, Сандерс ова го одлучил денеска на телеконференција со своите помошници.
Сандерс се обрати до своите поддржувачи со следниве зборови:
-Не можам да продолжам со чиста совест кампања која не можам да ја добијам и која ќе пречи во важната работа што ни претстои.
Изјави дека неговото име ќе стои во избирачките ливчиња и дека сѐ уште ќе собира гласови за делегати, во обид да ја пренесе својата порака и да влијае врз демократската платформа.
-Кампањата е завршена, но нашето движење продолжува, порача Сандерс.
Поради тешката пандемија на коронавирус во САД, кампањите и митинзите на двајцата преостанати кандидати за номинација, поранешниот потпретседател Џо Бајден и Сандерс, се запрени со недели.
Поради карантинот, двајцата се појавуваат мошне ретко на телевизија и се обраќаат во живо на интернет. Се дознава дека Сандерс бил повикан да излезе од кампањата за обединување на Демократската партија со една цел – пораз на актуелниот претседател Доналд Трамп.
Ведаш по изјавата на Сандерс, Бајден се заблагодари на „лидерот“ од Вермонт и ги повика неговите поддржувачи да се придружат.
-Треба да ги заслужам вашите гласови… ве гледам ве слушам и ја разбирам итноста на моментот, се надевам дека ќе се придржите. Добредојдени сте, потребни сте, соопшти Бајден на Twitter.
На веста реагираше и Трамп, кој вината за поразот на Сандерс ја посочи кон сенаторката Елизабет Ворен, која учествуваше во трката за номинација.
-Ако не беше таа, Сандерс ќе победеше на Супервторникот. Ова заврши токму како што сакаа ДНЦ и демократите… напиша Трамп на Twitter.