Нема повеќе фудбал во најквалитетната белгиска фудбалска лига. Водечките луѓе заклучија дека нема да има можност првенството да продолжи и прогласија крај.
„Бордот на директори ги зема предвид препораките на д-р Ван Ранст и на Владата дека тешко веројатно е натпреварите со публика да се доиграат пред 30 јуни. Моменталната ситуација, воедно, прави голема неизвесност и за продолжување на тренинзите во блиско време. Дури и натпревари зад затворени врати теоретски да се возможни, би додале само притисок врз здравствените установи, а тоа треба да се избегне“, стои во соопштението на официјалната веб-страница на лигата.
„Бордот на директори едносгласно одлучи дека не е пожелно натпреварувањето да се игра по 30 јуни. Со оглед на горенаведеното, одлучивме на Генералното собрание да му предложиме да не продолжи сезоната 19/20 и да се прифати моменталниот пласман во Јупилер Про лигата како конечен.
Белгија всушност и е во ситуација да направи фер прекин. Системот на натпреварување кој се употребува таму е регуларен дел во кој секоја екипа игра дома и на гости против сите останати, како што е скоро насекаде во Европа, но потоа, според пласманот, сезоната продолжува со плеј-оф за титула и плеј-оф за Лига Европа.
Сезоната се прекина по одигрувањето на 29. коло од регуларниот дел, што значи дека до крајот остана само едно коло. Бриж води убедливо со 15 бодови предност пред второпласираниот Гент, 16 пред третиот Шарлроа и 17 пред четвртиот Антверп.
Единствен проблем кој допрва ќе треба да го решат е испаѓањето. Ваасланд-Беверен е последен со 20 бодови, два помалку од Остенде и теоретски во последното коло би можел во победа да се спаси. И покрај ситемот со плеј-оф, последниот во регуларниот дел директно испаѓа.
Генералното собрание на белгиската лига ќе се состане на 15 месецов кога треба да го официјализира овој заклучок. За Бриж ова ќе биде 16-та титула.