Баварците многу полсено од очекувањата уште во Лондон обезбедија четвртфинале, додека Барселона не успеа да триумфира во Неапол кај тимот на Џенаро Гатузо.
Премиерлигашот ги разочара своите гледачи кои го наполнија „Стемфорд Бриџ“ откако загуби со убедливи 0:3 од Баерн.
Отпорот на Челси траеше 51 минута кога по одлично додавање од Роберт Левандовски резултатот го отвори Серж Њабри. Само три минуту подоцна идентична ситуација: Левандовски асистира, Њабри ја тресе домашната мрежа.
Во 76. минута, по двете асистенции, полскиот голгетер се запиша и во листата на стрелци поставувајќи ги конечните 0:3, резултат со кој Баерн е веќе четвртфиналист бидејќи овој тим на Челси просто е неверојатно да успее да направи чудо во Минхен.
Капак на бламажата на Челси стави Маркос Алонсо кој со ВАР доби директен црвен откако со рака по лицето го удри Левандовски.
Моќната Барселона гостуваше на „Сан Паоло“ кај Наполи, но и покрај фаворитската улога не успеа да го совлада тимот на Џенаро Гатузо.
Всушност, Наполи и прв поведе најавувајќи изненадување. Прекрасен гол постигна Дрис Мертенс на додавање на Пјотр Желињски.
Да нема изненадување под Везув се погрижи Антоан Гризман во 57. минута по една класична каталонска акција и асистенција од Нелсон Семеду.
Во 89. минута Артуро Видал набрзина заработи два жолти картони поради груб старт и потоа неспортско однесување што резултираше и со црвен.
Реваншите од овие два натпревара се закажани за 18 март.