Фудбал
ПРИЈАТЕЛСКИ НАТПРЕВАРИ

Аргентина конечно убедлива, Бразил изненаден од Перу

11. септември 2019 - 8:33 | Ф.З.

Аргентинците предводени од Лаутаро Мартинес го прегазија Мексико со 4:0, додека Перу славеше минимална победа против Бразил. Чиле со комбиниран состав загуби од Хондурас.

Ноќеска репрезентациите од Северна и Јужна Америка играа пријателски натпревари, а два резултата ја одбележаа вечерта.

Во Сан Антонио (САД) се сретнаа Аргентина и Мексико, а уште по првите 45 минути Ацтеките доживеаја бламажа. Со хет-трикот на Лаутаро Мартинес и голот од пенал на Леандро Перес Аргентинците поведоа со 4:0, резултат кој остана до крајот бидејќи во вториот дел мрежите мируваа. „Гаучосите“ играа без Лео Меси кој е суспендиран поради коментарите на Копа Америка.

Еквадор со 3:0 ја преслуша Боливија, Колумбија и Венецуела играа без голови, САД и Уругвај ремизираа 1:1, додека Чиле беше непријатно изненаден од Хондурас губејќи со 2:1.

Сепак главното изненадување се случи во Лос Анџелес каде Перу оствари минумална победа над Бразил. Иако „кариоките“ беа скоро во најсилниот состав, Луис Абрам на пет минути до крајот му ја донесе победата на Перу по асистенција на Јошимар Јотун.