Музика

Адел oслабе 20 килограми: На што се должи драстичната промена?

8. јануари 2020 - 15:58 | А.С.

Британската пејачка Адел ги шокираше фановите со драстичната промена откако ослабе 20 килограми.

Музичката ѕвезда покажа колкава промена ѝ се случила во изминативе месеци кога по подолго време се појави во јавност на одмор со колегите Хари Стајлс и Џејмс Корден.

Во октомври, 2019 година британските таблоиди пишуваа дека Адел почнала да работи со тренерот Џо Викс во тајност и дека ја следи неговата програма на вежби со висок интензитет.

Извори на The Sun велат дека таа не сака да вежба пред други луѓе, но дека следи строги режими на исхрана и вежбање во приватноста на нејзиниот дом.

Неочекувана промена

Слабеењето никогаш не било приоритет за Адел која досега секогаш зборувала дека не чувствува несигурност поради тоа како изгледа, откако се прослави во 2008 година.

Таа дури и фамозно изјавуваше дека нема да соработува со никој кој има проблем со нејзината големина.

„Кога го потпишував договорот, повеќето луѓе во музичката индустрија знаеја дека ако некој се осмели да ми каже да ослабам, нема да работи никогаш со мене“, изјави тогаш Адел за списанието People.

Сличен став покажа и во 2009 година кога за Daily Mail изјави: „Не можам да бидам нечиј производ, никој не може тоа да ми го направи. Јас одлучувам. Јас имам моќ и овластување врз сѐ што правам.“

Кога во 2012 година дизајнерот Карл Лагерфелд јавно ја искритикува дека е „малку дебелка“, Адел одлучно изјави дека е „многу горда“ на својот изглед и додаде: „Тежината нема никаква врска со мојата кариера“.

Како ослабе 20 килограми?

Секој кој некогаш сакал да слабее знае дека тоа воопшто не е лесен, ни едноставен процес. Токму затоа многу се шпекулира како Адел успеа да намали 20 килограми за околу шест месеци.

Наспроти изворите на The Sun кои велат дека Адел напорно вежба, извори блиски до пејачката велат дека драстичното слабеење повеќе се должи на строг режим на исхрана, а помалку на вежбање бидејќи Адел „не сака да вежба“.

Суперѕвездата наводно работела со „бразилската фитнес волшебничка“ Камила Гудис која ѝ помогнала во слабеењето.

Во биографијата на Камила, која живее во Лос Анџелес, пишува дека таа користи „комбинација на разни пилатес вежби, како и вежби за зајакнување на мускулите на торзото“.

Камила, која наводно се запознала со Адел преку сопругата на Роби Вилијамс, за The Sun изјави: „Не верувам дека сака многу да вежба, но направила промени во начинот на живеење и сметам дека слабеењето се должи на 90% строг режим на исхрана.“