Аукциска куќа во Швајцарија продаде 25 луксузни возила, вклучувајќи модели на Ferrari, Rolls-Royce и Lamborghini, што властите во Женева ги запленија од синот на претседателот на Екваторска Гвинеја, како дел од истрагата за перење пари.
Ѕвезда на аукцијата на која беа собрани речиси 22 милиони евра беше ултрареткиот Lamborghini Veneo што се продаде за 7,6 милиони евра, што е светски рекорд, соопшти швајцарскиот огранок на британската аукциска куќа Bonhams, додавајќи дека произведени се само девет примероци од овој модел.
Швајцарските власти објавија дека парите собрани на аукцијата ќе бидат донирани во хуманитарна организација за помош на народот на Екваторска Гвинеја, земја во централна Африка што излегува на Атлантскиот Океан, богата со нафта, но една од најкорумпираните земји на светот според податоците на Transparency International.
Аукцијата следеше откако Обвинителството во Женева во февруари објави дека го заклучила случајот за Теодоро Нгуема Обијанг Мангуе, син на долгогодишниот претседател на земјата Теодоро Обијанг Нгуема Мбасого, и уште две други лица, по истрага за перење пари и проневера на јавни средства.
Синот на претседателот на Република Екваторска Гвинеја, кој исто така е потпретседател на земјата, имал правни проблеми и на други места. Во 2017 година суд во Париз го осуди за проневера на милиони долари државни пари, но тој случај е во жалбена постапка.
Во последната истрага беа вклучени властите во САД, Франција, Монако, Данска, Холандија, Кајмански Острови и Маршалски Острови.
