Возачот на камионот во кој се пронајдени 39 тела, кој е обвинет за убиство и заговор за трговија со луѓе, се појави денеска пред британскиот суд преку видеолинк.
Возачот Морис Робинсон (25) пред судот во Челмсфорд преку видеолинк го потврди својот идентитет и адреса.
Тој е обвинет по 39 точки за убиство, заговор за трговија со луѓе, заговор за помош за незаконска миграција и за перење пари, соопшти полицијата.
Робинсон не поднесе барање за кауција, а во притвор ќе остане до 25 ноември кога ќе продолжи постапката во централниот кривичен суд во Лондон.
Тој е уапсен веднаш откако беа откриени 39 тела во камион-ладилник во средата, неколку километри од англиското пристаниште Парфлит.
Британската полиција првично соопшти дека жртвите најверојатно се државјани на Кина, но подоцна се појави информација дека се работи за луѓе од Виетнам.
Полицијата рече дека многу мал дел од жртвите имале документи за идентификација со себе и дека се работи на нивно идентификување преку отпечатоци на прсти, заби и ДНК примероци, како и со фотографии на роднини и пријатели.