Во текот на 60-тите и 70-тите години од минатиот век трендот кај многу сопственици на VW Beetle беше да ги преработат овие возила во така наречено Buggy. Покрај тоа што се работеше за прилично едноставна преработка, возењето во Buggy возилата беше неверојатно забавно.
Volkswagen уште одамна ја прифати оваа преработка како свој посебен модел, а сега сака на современ начин да го оживее тоа возило.
Германската компанија објави неколку фотографии со кои го најави новиот концепт за Buggy, кој не е базиран на моделот Beetle, туку на новата платформа Modular Electric Drive Matrix (MEB). На тој начин легендарното Buggy кое некогаш беше идеано за возење по песочните плажи и планини, сега е замислено како целосно електричен модел кој би требало да биде подеднакво способен и забавен.
„Buggy е повеќе од автомобил. Тоа е живот и енергија на четири тркала. Овие атрибути ќе бидат оживеани во новото e-Buggy кое ќе биде спој од ретро и футуристички дизајн, со кој ќе биде лесно препознатливо но истовремено и прилагодено кон модерното време“, изјави Клаус Бишоф, главниот дизајнер на Volkswagen.
Бидејќи се работи само за тизер, компанијата не понуди никакви конкретни информации за новиот модел. Јасно е дека примарната мисија на Volkswagen со овој ретро модел не е да се предизвика носталгија, туку да се покаже сестраноста на MEB платформата.
Volkswagen официјално ќе го открие концептот за ова е-Buggy за нешто повеќе од еден месец на Саемот за автомобили во Женева.