Планираа голема пресметка во финалето, а на крај завршија играјќи за пласман од 5 до 8 место. Србија со 94:89 го совлада САД во пирова победа која за Американците значи и најлош пласман во историјата на мундијалите.
Никој не предвидуваше дека најголемите фаворити за златото, репрезентациите на САД и Србија, ќе ги гледаме во натпревар кој одлучува за пласман од 5-то до 8-мо место. Но, откако доживеаја четвртфинални елиминации од Аргентина и Франција, токму тоа и го заслужија.
Во првата четвртина Србите буквално ги прегазија Американците добивајќи ги со неверојатни 32:7, но во наредната САД вратија со иста мера добивајќи ја 33:12.
До крајот се водеше прилично израмнета битка иако српските кошаркари водеа цело време, на моменти и со десетина поени разлика. Интересно, Американците само еднаш имаа водство и тоа на почетокот кога први постигнаа двојка.
Најефикасен беше Богдан Богдановиќ кој постигна 28 поени, Харисон Барнс даде 22, додека Кемба Вокер 18.
Сега Србија во дуелот за 5-тото место ќе игра со победникот од Полска - Чешка, додека САД ќе игра за 7-мото со поразениот од истиот натпревар. Во секој случај тоа ќе биде најслаб пласман во историјата на САД на мундијалите, надминувајќи го она шесто место во 2002 на домашен терен.
