Хроника

Скопјанец обвинет затоа што во домот држел муниција

17. октомври 2019 - 14:04 | МИА

Скопје, 17 октомври 2019 (МИА) – Основното јавно обвинителство Скопје до Основниот кривичен суд Скопје поднесе обвинителен акт против 38-годишен скопјанец за сторено кривично дело  – недозволено изработување, држење и тргување со оружје или распрскувачки материи.

Како што соопшти Јавното обвинителство, на 23 август обвинетиот во својот дом во Сингелиќ, неовластено кај себе имал 73 куршуми, од кои 67 парчиња од кинеско и шест од албанско производство.

Куршумите со калибар 7,62х39 биле наменети за испалување од различни видови репетирачки, полуавтоматски и автоматски огнени оружја.

Надлежниот јавен обвинител достави и предлог за продолжување на определената мерка куќен притвор за обвинетото лице.