Фудбал

Шведска го повика Кулушевски, Македонија извиси

7. ноември 2019 - 12:46 | Ф.З.

Откако во неколку наврати одбиваше да игра за Македонија, Дејан Кулушевски сега го чека деби настап за Шведска што според правилата на ФИФА ќе значи дека никогаш повеќе нема да може да игра за македонската репрезентација.

Уште еден Македонец ѝ даде корпа на Македонија. Од татко Македонец, мајка Македонка, но роден во Шведска, фудбалерот Дејан Кулушевски одбра да глуми викинг.

Селекторот на репрезентацијата на Шведска, Јане Андерсон, го повика „нашиот“ играч за претстојните квалификациски натпревари за пласман на ЕУРО 2020 кои Шведска ќе ги игра против Романија дома и Фарските Острови на гости.

Иако има само 19 години, Кулушевски одлично игра сезонава за Парма во Серија А. Нашиот селектор Игор Ангеловски пробуваше да го вметне во македонската репрезентација, но „Швеѓанецот“ упорно одбиваше да заигра реамо до рамо со Пандев, Несторовски, Елмас, Адеми, Димитриевски и останатите.

Доколку Кулушевски настапи и неполна минута на било кој од овие два квалификациски натпревари, според законите на ФИФА тоа ќе значи дека тој никогаш повеќе не ќе може да заигра за друга репрезентација, во случајов Македонија.

Кулушевски настапуваше за македонската репрезентација до 16 години, но потоа одлучи среќата да си ја бара во младинските категории кај Швеѓаните. Последиве година дена играше за нивната репрезентација до 21 година.

Пред две и пол недели, кога неговата Парма гостуваше кај Џеноа на Горан Пандев, тој дојде до нашиот капитен за да се поздрави. Очигледно никогаш нема да види како е да се игра крај играч од калибарот на Пандев, наместо тоа ќе игра крај Свенсони, Бергови, Олсони, Јансони и други викинзи.