Фудбал
1.МФЛ 2019/20

Шкендија конечно најде нов тренер

8. октомври 2019 - 14:33 | Ф.З.

Албанецот Ернест Ѓока е нов предводник на македонскиот шампион со мисија да го врати заспаниот џин на победничките патеки.

49-годишниот Ѓока е роден во Тирана и за него ова ќе биде прва авантура надвор од Албанија. Досега ги водел Аполонија, Камза, Томори, Фламуртари, Влазнија и Кук'си со кој во сезоната 2016/17 стана шампион на Албанија. Во 2014 го освои домашниот куп со Фламуртари од Валона, а во 2016 и Суперкупот со Кук'си.

Тетовскиот клуб му се заблагодари на Ерхан Селими кој го водеше тимот по отказот на Ќатип Османи сѐ до пронаоѓањето на нов тренер.

Ѓока преферира формација 4-2-3-1, што секако ѝ одговара на и онака офанзивната Шкендија бидејќи Османи токму таа формација и ја преферираше.

Шкендија е големо разочарување сезонава откако прво се избламира со настапите во квалификациите за Лигата на шампиони и Лига Европа доживувајќи елиминации од естонски Калју и луксембуршки Дуделанж. Крахот продолжи и во домашното првенство каде по 9 кола има дури 4 порази и заостанува цели 9 бода зад лидерот Вардар.

Прв предизвик за Ѓока ќе биде Академија Пандев која гостува во Тетово на 19-ти.