Извршната директорка на модната групација H&M, Хелена Хелмерсон, денеска соопшти дека се повлекува од функцијата.
Цената на акциите на шведската компанија нагло падна откако компанијата објави помала од очекуваната добивка во четвртиот квартал.
Хелмерсон, која помина четири години на чело на компанијата и рече дека работата ѝ била „многу напорна“, ќе биде заменета со Даниел Ервер, кој работеше за компанијата 18 години на различни позиции, од кои последната беше раководење со брендирањето на H&M.
Акциите на групацијата паднаа за 9% на Стокхолмската берза по најавата за заминувањето на Хелмерсон. Шведската групација, вториот најголем синџир на малопродажба на облека во светот по Inditex (под чија капа е Zara), објави нето добивка од 840 милиони долари во 2023 година, што е зголемување за 2,5 пати во споредба со претходната година.
„Нашата работа за подобрување на синџирот на снабдување и тековната нормализирање на надворешните фактори кои влијаат на трошоците за набавка резултираа со посилна бруто маржа“, се вели во соопштението на H&M.
„За многу потрошувачи годината беше одбележана со помала куповна моќ поради високата инфлација и високите каматни стапки. И покрај тоа, нашата нето-продажба на споредливи пазари се зголеми во однос на 2022 година“, се вели во соопштението.
Нето-продажбите се зголемија за шест отсто во целата година на 236 милијарди круни. Но, во четвртиот квартал, модниот гигант извести за пад на нето-продажбата од 4% во локални валути.
Нето добивката на H&M во четвртиот квартал достигна 1,58 милијарди шведски круни, во споредба со нето загубата од 864 милиони шведски круни една година порано. Но, според истражувањето на Bloomberg, тоа е далеку под очекувањата на аналитичарите за профит од 3,12 милијарди круни.
Оперативниот профит за годината се зголеми повеќе од двојно на 14,5 милијарди круни, што одговара на оперативната маржа која речиси двојно се зголеми во текот на периодот, од 3,2 на 6,2 отсто. Фискалната година на компанијата трае од декември до ноември.
Повлекувањето од Русија во 2022 година по рускиот напад на Украина и програмата за намалување на трошоците ја чинеа компанијата речиси 2,6 милијарди круни.
Групаcијата, која покрај H&M вклучува брендови како COS, Arket, & Other Stories и Monki, рече дека гледа „добри услови за континуиран профитабилен и одржлив раст во 2024 година“.
Додаваат дека имаат за цел „да ја зголемат продажбата за 10-15 проценти годишно со континуирана висока профитабилност“.
