Голманот на „Бјанконерите“ предупредува дека победата над Каљари не смее да ги залаже бидејќи тимот мора да почне да игра далеку подобро.
Од ноември Јувентус прими само два гола во Серија А, што значи дека успеа да ги среди недостатоците во дефанзивата кои беа стандард на почетокот од сезоната.
„Работевме напорно, но сметам дека имаме уште многу работа за да се подобриме, како во одбраната така и во нападот“, вели голманот Војчех Шченсни говорејќи за DAZN.
„Често при водство од 1:0 се опуштаме и стоиме премногу длабоко, а тоа долгорочно не е добро. При такви ситуации играме арогантно, што не ми се допаѓа“.
Каљари синоќа имаше две големи шанса за гол, со кои ќе се избореше за реми и голем бод, но прво Далберт не успеа убаво да ја зафати топката во петерецот, а потоа Шченсни одлично му одбрани на Жоау Педру.
„Ни се случи многупати, вклучувајќи го и натпреварот со Венеција кога и примивме гол. Во второ полувреме стоиме премногу длабоко, не смееме секој натпревар 10-15 минути да го губиме интензитетот на игра. Сега минавме добро, но со Венеција загубивме два бода, така да не смееме да го правиме тоа“, објаснува полскиот голман.
