Концепти

Рускиот Rolls Royce SUV пристигнува во март, Арапите чекаат ред за да го купат

20. февруари 2019 - 11:29 | К.З.

SUV возилата забележуваат тренд на пораст на популарноста, а ова го забележа и руската компанија Aurus, која реши да произведе посебно луксузен автомобил од овој сегмент. Министерот за индустрија и трговија во владата на Русија, Денис Мантуров, најави дека првиот прототип за новиот Aurus Komendant ќе пристигне овој март.

Руската верзија на елитниот Rolls-Royce Cullinan ќе биде наречена Aurus Komendant, а се очекува дека најголема побарувачка за овој модел ќе има кај купувачите од Блискиот исток.

Со оглед на тоа дека 36% од вкупните сопственички акции во компанијата Aurus му припаѓаат на арапскиот холдинг Tavazun, постои можност дека рускиот автомобилски производител ќе ги прошири погоните и ќе произведува дел од возилата на територија на Обединетите Арапски Емирати.

Новиот SUV Aurus Komendant е базиран на лимузината Senat од истата компанија, која дебитираше на пазарот во август минатата година.

Според очекувањата, автомобилот би требало да биде опремен со 4,4-литарски V8 бензински мотор кој во комбинација со деветостепениот автоматски менувач испорачува скоро 600 коњски сили и 880 Nm.

Во меѓувреме, на почетокот на следниот месец на престижниот Саем на автомобили во Женева, Aurus премиерно ќе го претстави моделот Senat пред европската публика.