Напаѓачот Милан Ристовски, од кого се очекуваат голови против Грузија, вели дека македонската фудбалска репрезентација може многу повеќе од она што го покажа со Бугарија и Гибралтар и ветува дека тоа ќе го покажат в четврток.
Македонија одигра само 1:1 против Бугарија, а потоа го совлада Гибралтар со 2:0. На двата натпревара се очекуваше повеќе, па сега следува поправен, но и вистински тест против лидерот во групата, селекцијата на Грузија.
„На овие два натпревара го покажавме нашиот квалитет. Сметам дека можеме многу повеќе и се надевам дека тоа ќе го покажеме веќе на следниот натпревар со Грузија“, вели Ристовски.
Грузија почна одлично во Лигата на нации со победа од 4:0 дома над Гибралтар, а потоа ја збриша Бугарија на гости со 5:2.
„Сигурно тие две победи се од големо значење за нив и за нивната самодоверба. Сигурно ќе биде тежок натпревар, ќе дојдат мотивирани против нас, се борат за прво место. Треба да веруваме во нас и во замислата на селекторот, во нашиот квалитет, да покажеме желба и борба и да дадеме сѐ од себе“, дополни помладиот брат на капитенот Стефан, кој поради повреда не е во тимот.
Во прилог целосната изјава на Ристовски:
