Пандемијата толку многу влијаеше на деловната активност на шведскиот моден гигант, што во ерата по короната, H&M значително ќе го промени начинот на деловно работење.
И не само тоа, H&M, како втор по големина малопродажник на облека на планетата, би можело да почне нов тренд со своите одлуки што многумина несомнено ќе ги следат.
Централното претставништво на главниот плоштад во Стокхолм ќе биде нивниот прв малопродажен простор што ќе се промени. Продавницата веќе нема да биде само место каде што клиентите можат да купуваат облека, но на таа локација, на пример, ќе се шијат закрпи за панталони, ќе се изнајмуваат фустани за забави, а ќошињата на просторот ќе бидат пренаменети во салони за убавина.
Можете ли да замислите продавници кои веќе не се само продавници, туку модни салони со мали занаети и придружни услуги? Швеѓаните се обложуваат токму на тоа, бидејќи колку повеќе луѓе купуваат преку интернет, толку повеќе големите продажни простори стануваат помалку потребни.
И наместо да се обидат да се ослободат од мртвиот капитал, тие ќе се обидат да го оживеат и да инвестираат во зајакнување на брендот.
Според светските медиуми, H&M соопштиле дека првата третина од оваа година во деловна смисла поминала многу подобро отколку што очекувале. Тие планираа пад на бизнисот бидејќи карантините ширум светот ги принудија клиентите почесто да купуваат облека преку интернет.
Иако овој метод на испорака ги намалува нивните трошоци, тоа значи и намалување на потребата за физички продавници. H&M најави затворање на 350 од приближно 5.000 продавници ширум светот оваа година, а планот е да се отворат само сто нови.
