Хардвер

Основачот на Apple тврди: Ова е најдобриот гаџет во светот

29. август 2019 - 13:19 | Б.С.Б.

Успехот на компанијата Apple најчесто се поврзува со Стив Џобс и неговата визија, но таа компанија веројатно не би остварила таков успех без другиот основач, Стив Вознијак.

Вознијак заедно со Џобс го основа Apple, но веќе подолго време не е дел од таа компанија. За Bloomberg тој отворено откри неколку интересни детали за промените во Apple  и транзицијата низ која мина компанијата.

Последниот квартал годинава покажа одлични продажни резултати за AirPods слушалките и Apple Watch часовниците, а токму тој паметен часовник се покажа како најомилен гаџет и најдобро хардвер парче за Вознијак.

Иако не ги користи сите опции кои часовникот ги нуди, како што се следење на здравјето и фитнес активности, Вознијак напомнува дека часовникот нуди и други можности. Особено ги истакнува услугите како Apple Pay и Apple Wallet. Тој вели дека не сака да биде зависник од неговиот телефон, па во секојдневната работа користи Mac и Apple Watch.

Смета дека технолошките компании станале преголеми и премногу моќни, како и дека на корисниците не им даваат избор додека Apple  се издвојува како компанија која се грижи за нејзините корисници бидејќи не заработува пари од следење луѓе и кршење на нивната приватност, туку од продажба на квалитетни производи.