Дали некогаш сте се запрашале што сè се наоѓа на детските дланки кога децата ќе си дојдат дома од играње? Не само тоа што го гледате, туку и тоа што не се гледа со голо око? Една мајка и научничка го дава одговорот на ова прашање.
Научничката Таша Стурм одлучи да истражува што сè се крие на дланките на нејзиниот 8-годишен син и тоа после играње во природа, во друштво на нивното куче. Таа направи отпечаток од дланката на синчето, а потоа истиот го постави под микроскоп.
Фотографијата што ја објави многумина ги остави шокирани, бидејќи станува збор за различни бактерии и габи.
„Жолтите и портокаловите дамки претставуваат габи, за белите точки се верува дека се бацили, бактерии кои често ги има во вода, валканици и стафилококи, бактерии кои можат да бидат причинители за различни инфекции“, објаснува таа.
Но, сето тоа не е страшно.
„Ова што го гледаме е нормално бидејќи ние секојдневно сме изложени на овие работи. Кожата нè штити од многу полоши работи. За да имате силен имунитет мора да бидете изложени на вакви работи“, објаснува Таша.
Со неа се согласува и д-р Џек Гилбер од Универзитетот во Чикаго.
„Габите не се лоши по здравјето на децата, дезинфекцијата на детските раце може да им наштети отколку да им користи, на пример да развие разни алергии. Имуниот систем така станува многу чувствителен“, објаснува докторот.