Лигата на шампионите ќе ја освои Реал или Борусија, во Англија гледаме голема битка помеѓу Сити и Арсенал, Жирона е вистински хит во Ла лига, Болоња жари и пали во Калчото, но оваа сезона ќе остане запаметена најмногу по резултатите на еден тим - Баер од Леверкузен.
Баер синоќа го собори рекордот по број на натпревари без пораз во сите натпреварувања, а со синоќешното реми 2:2 против Рома нивната чудесна серија изнесува 49 натпревари.
Јосип Станишиќ погоди во 7. минута од судиското надополнување во вториот дел за 2:2, а тоа беше 11-ти натпревар сезонава во кој Баер избегна пораз по 90-тата минута од натпреварите.
Пред синоќешниот натпревар, на истекот на 90-тата минута, Баер три пати губеше од Карабаг, двапати од Штутгарт и по еднаш од Баерн, Аугсбург, Лајпциг, Хофенхајм и Дортмунд и секој пат избегнуваше пораз на крајот од натпреварот.
А, дека се специјалисти за голови во последните минути говори податокот дека постигнаа голови по 90-та минута на уште четири натпревари (Отенсен, Зандхаузен, Вест Хем и Вердер) во кои беа во предност.
До крајот на сезоната на Баер му претстојат уште 4 натпревари - два во првенството против Бохум и Аугсбург, финалето во Лига Европа против Аталанта и финалето од ДФБ купот против Кајзерслаутерн.
Веќе ја освоија Бундеслигата, а со оглед на тоа дека се фаворити против Аталанта и Кајзерслаутерн, многу е веројатно дека оваа сезона ќе освојат тројна круна и со тоа ќе ја заокружат најдобрата сезона во клупската историја.
