Шакира е препознатлива по песните кои станаа глобални хитови како што се „Hips Don't Lie“ или „Waka Waka“, но ретко кој знае дека на почетокот на нејзината кариера таа се испробала и во актерството.
Меѓутоа, бидејќи не била задоволна од тоа како изгледала тогаш, ги откупила правата за прикажување на серијата.
Колумбиската пејачка имала 16 години кога глумела во теленовелата El Oasis во 1993 година, но брзо сфатила дека пеењето е нејзиниот прв избор, а актерството веројатно не ѝ било едно од најдобрите искуства во тоа време, поради што ги купила правата за да спречи да биде емитувана.
Шакира ја играла улогата на Луиза Марија, која откако се соочува со природна катастрофа во нејзиниот роден град, ја пронаоѓа љубовта со Саломон, кој го игра Педро Рендон. Доколку сакате да ја гледате теленовелата, голема е веројатноста дека нема да најдете многу содржина на интернет, бидејќи пејачката ги купи правата од CenproTV.
Еден од ретките клипови од серијата беше споделен на X (Twitter), а може да се забележи дека пејачката изгледа значително поинаку.
Режисерот Педро Моголон еднаш откри за Buen Día Colombia дека Шакира се издвојувала од актерската екипа иако имала само 16 години.
„Знаев дека таа девојка ќе оди далеку порано или подоцна“, рече тој и додаде: „Не бев изненаден кога стана ѕвезда, знаевме дека ќе биде“.
Тој откри и дека не ѝ се допаѓало како изгледала: „Таа сакаше да биде русокоса и тоа беше нејзина одлука. Еден ден стигнав во CenproTV да си ја земам платата и ми рекоа има уште еден чек за мене бидејќи некој ги купил правата. Знаев дека таа серија веќе никогаш нема да игра на телевизија“.
Пејачката подоцна имаше неколку појавувања во серии, но во поединечни епизоди. Обожавателите се сеќаваат на нејзиното појавување во Wizards of Waverly Place на Disney заедно со Селена Гомес.
