Синоќа во Париз беше доделена наградата Златна топка за 2019 година, според резултатите од анкетата на францускиот неделник France Football и победникот, по шести пат, е Лионел Меси.
Новинарот на „Вечер“ Марио Сотировски беше еден од 175 спортски новинари од целиот свет кои ги поделија своите гласови на кандидатите во потесниот избор.
Секој од новинарите имаше задача да состави список од петмина играчи на кои им доделува 6, 4, 3, 2 односно 1 поен, од првото кон последното место на листата.
Македонскиот новинар го потврди изборот на победникот, давајќи му максимални шест поени на Меси, а натаму на листата ги рангира: Мохамед Салах (4), Кристијано Роналдо 3), Алисон (2) и Вирхил Ван Дајк (1).
Напаѓачот на Барселона со 686 поени го победи одбранбениот играч на Ливерпул Ван Дајк кој заврши на второто место со 679 поени.
Меси веќе го доби трофејот во 2009, 2010, 2011, 2012 и 2015 година, а сега го наследува од Лука Модриќ.
Најголемиот ривал на Лео во последните 10 години, Кристијано Роналдо кој сега игра во Јувентус, заврши на третото место со 476 поени. Португалецот не присуствуваше на церемонијата во Париз.
