Германката Фиона Колбингер е победник на Трансконтиненталната велосипедска трка низ Европа поминувајќи 2.485 километри за само десет дена и оставајќи зад себе 215 натпреварувачи од посилниот пол.
Ѝ беа потребни 10 дена, 2 часа и 48 минути, додека второпласираниот Британец Бен Дејвис заостануваше цели 200 километри во моментот кога Колбингер стигна на целта утринава.
„Премногу сум изненадена од победата. Кога се пријавив за трката си мислев дека би можела да завршам прва меѓу жените, но никогаш не се надевав дека ќе бидат севкупна победничка“, рече 24-годишната Колбингер која работи како истражувач на лек за карцином.
Трансконтиненталната трка за првпат се одржа во 2013 година кога велосипедистите стартуваа од Лондон, а завршија во Истанбул. Оваа година почетокот беше во бугарскиот град Бургас, а целната линија во Брест на северот на Франција.
Натпреварувачите мораат да се придржуваат до строги правила за време на возењето. Можат самите да си го одберат патот по кој ќе возат, но мора да поминат низ неколку контролни пункта, а задолжително е минување и низ преминот Тимелсјох на височина од 2.474 метри во Јужен Тирол на границата помеѓу Италија и Австрија. По пат не смеат да прашуваат луѓе за насоки, а мораат сами да се снаоѓаат за храна и за спиење.
Оваа година трката минуваше низ Бугарија, Србија, Косово, Босна и Херцеговина, Хрватска, Словенија, Италија, Австрија, Швајцарија и Франција. Од 265 велосипедисти 40 беа жени, а за првпат жена е севкупен победник.
