„Вселенскиот“ пикап Tesla Cybertruck, според сопственикот на компанијата, најверојатно ќе добие специјална верзија со високи перформанси.
Долгоочекуваниот и многу најавуван Tesla Cybertruck, електричен пикап кој конечно треба да се појави на пазарот пред крајот на оваа година, би можел да добие верзија со високи перформанси со поголема моќност и поголем вртежен момент.
Првиот човек на Tesla, Илон Маск, на социјалната мрежа Х се пофали дека возел „Cybertruck со високи перформанси“ и истакна дека овој пикап „растура на повисоко ниво“.
Маск во коментар на својата објава индиректно потврди дека во производство ќе биде и верзијата „Performance“ на Cybertruck.
Се очекува дека Tesla на пазарот ќе понуди неколку различни верзии на Cybertruck, кога станува збор за капацитетот на батеријата и опсегот на возилото, покрај онаа што штотуку ја најави Маск.
Конечните спецификации и цените по верзија сè уште не се објавени, но компанијата излезе со некои бројки за потенцијалните купувачи.
Познато е дека Tesla Cybertruck ќе може да влече приколка со вкупна тежина од 6.350 килограми, а во својот товарен простор ќе може да пренесе до 1.587 килограми товар.
Просечниот опсег со едно полнење на батеријата треба да биде околу 800 километри (500 милји), додека просечното забрзување од 0 до 96 км/час (60 милји на час) е 2,9 секунди.
Производството на ограниченото издание на Tesla Cybertruck во фабриката во Тексас се очекува да започне пред крајот на оваа година, додека фабричките линии треба да се вртат со полна брзина во текот на 2024 година.
