Кичево, Пробиштип, 14 септември 2019 (МИА) – Во моментов во кичевско беснее голем шумски пожар во атарот на селото Колибари, додека сува трева и ниско стеблеста шума во моментов гори во околината на општина Пробиштип.
Месната заедница од ова кичевско село излезе со апел до селаните, особено младите, да се приклучат во гаснењето на овој пожар.
- Противпожарната единица од Кичево веќе е на терен и заедно со месното население се борат огнот да го стават под контрола. Тешкотија преставува непристапниот терен, а таму веќе се и преставниците на шумското претпријатие „Лопушник”, преставници на Дитекцијата за заштита и спасување и преставници на локалната самоуправа. Во прв план ни е да ги заштитиме куќите и да се стави пожарот под контрола, информира Дарко Гргоски од ППТЕ - Кичево.
Според него се очекува наскоро да интервенираат и авионите за гаснење на пожарот.
Градоначалникот на општина Пробиштип, Драган Анастасов, рече дека станува збор за поголема површина и дека во моментов не може точно да се каже колкав простер е зафатен.
Информира дека пожарот се движи кон селата во општина Свети Николе и дека за негово гаснење ангажирани се 23 пожарникари и членови на резервниот состав на противпожарната единица во Пробиштип. Во гаснење на пожарот се приклучуваат и пожарникари од Свети Николе.
Атансов вели дека за пожарот известена е Дирекцијата за заштита и спасување и дека од нив се бара да се вклучат и ЕР тракторите, со цел огнот да не се доближи до првите куќи на селата.
