Руските емигранти отвораат свои фирми, продавници и ресторани, а насекаде се слуша и рускиот јазик. Големи промени ја очекуваат српската престолнина бидејќи се очекува околу 200 илјади Руси трајно да се населат, пишува Mondo.rs.
Ако само дел од руските имигранти останат во главниот град на Србија, тоа ќе донесе големи промени, пишува швајцарскиот Neue Zürcher Zeitung. Во извештајот се наведува дека повеќето Руси не дошле од политички причини, туку за работа. „Од почетокот на војната во Белград живее голема и шарена руска дијаспора. Многумина веројатно ќе останат и ќе го променат градот“, пишува Neue Zürcher Zeitung. Во репортажата на угледниот весник се наведува дека во Србија пристигнале околу 200.000 Руси, што се оценува како „имиграциски бран од историски размери“.
„Нивното присуство го менува главниот град и принудува некои Срби да ја ревидираат искривената слика за Русија и Путин“, се наведува во текстот. Првиот бран по избувнувањето на војната донесе дисиденти и активисти во земјата. „Во вториот бран во септември, покрај противниците на војната, дојдоа и многу експерти и бизнисмени кои ја напуштија Русија поради економските последици од војната. Србија стана дестинација бидејќи не воведе санкции кон Москва. Нема забрана за патување. Секој што ќе регистрира компанија добива веднаш дозвола да остане, другите мора да ја обновуваат туристичката виза повторно и повторно“, пишува циришкиот весник.
Репортерот разговарал со Денис (26), Русин кој избегал од мобилизација за војна што не ја одобрува. Сега во Белград работи во невладина организација и помага во евакуацијата на бегалците од Украина. Тој вели дека му се допаѓа во Белград.
Со кого и да разговара, скоро секогаш имаат симпатии кон него. Но, за жал, често од погрешни причини. „Тие некако можат да сфатат зошто избегав од војната. Велат дека Западот го испровоцирал Путин. Не можев да ги убедам“, се наведува во весникот. Денис вели дека неговите соговорници во никој случај не прифаќаат дека Русија ја започнала војната.
Во написот се наведува дека над 60% од Србите ги обвинуваат НАТО и Западот за војната. „Тој наратив вели: додека НАТО ја бомбардираше Србија за време на војната во Косово во 1999 година, Западот сега се обидува да ја фрли Русија на колена. Оваа аналогија може да се слушне во секое такси и во секоја гостилница и секојдневно да се чита во весниците. Индиректната порака е дека сега Русија ќе се одмазди за српското понижување“, пишува весникот.
Репортерот Андреас Ернст, претходно долгогодишен дописник од Белград, опишува дека рускиот јазик се слуша насекаде, во парковите на Стариот град, на улиците на Дорчол или во Врачар. „Од неодамна има руски продавници, ресторани и барови, а бидејќи руските емигранти се претежно млади и урбани, тие исто така ја менуваат културната сцена“.
На новинарот му личи на времето по Октомвриската револуција во 1917 година, кога во Белград дошле илјадници противници на револуцијата. Тие, пишува, во Белград го донеле ноќниот живот по кој градот денес е надалеку познат. „Ако барем дел од руските мигранти се вкорени таму, градот ќе се промени и економски. Минатата година во Србија беа регистрирани 4.500 руски компании. Голем дел од нив се од ИТ секторот“, наведува Neue Zürcher Zeitung.
Тоа се гледа по цените. Репортерот го опишува барот што руските имигранти го отвориле во Дорчол. Таму лимонадата увезена од Берлин чини околу 5 евра, што за Белград е „бесрамно скапо“, пишува новинарот. Но, многу гости од Русија го плаќаат без проблем.
Петер Никитин (42), адвокат и активист, се надева дека присуството на толку руски мигранти ќе ги разбие вкоренетите позитивни предрасуди на Србите за денешна Русија. Никитин го води Руското демократско друштво, организира дискусии и протести во Белград. Како што процени во интервју за швајцарскиот весник, само една петтина од Русите во Белград може да се опишат како политички противници на војната, уште една петтина се загрозени од војна, додека 60% се неутрални. „Тие чекаат да видат како ќе се развиваат работите дома“, вели Никитин.
